Министерот за транспорт и врски, Горан Сугарески оствари работна посета на општина Ресен . На средбата со градоначалникот разговараа за инфраструктурните проекти што се реализираат во општинта.

Министерот Сугарески најави дека во тек е постапка за изработка на проект за изградба на обиколница во Ресен, како едно од најголемите барања на Општината во делот на инфраструктурата. 

Во продолжение следува изјавата на министерот за транспорт и врски, Горан Сугарески.

“Разговаравме за инфраструктураните проекти што се реализираат во општината како со поддршка од централната власт, така и проектите што ги реализира општината. 

Она што му недостасува на градот е обиколница за што сакам да најавам дека во тек е тендерот за изработка на проект за обиколница Ресен. 

Некаде со средината на август ќе заврши постапката и веднаш ќе започнеме со изработка на проектот со средства од буџетот на ЈП за државни патишта. Откако ќе го направиме проектот ќе ги видиме решенијата и динамиката на изградба на обиколницата со што ќе ги растеретиме улиците низ градот од товарни возила. 

Во делот на проектитет што ги реализираме преку Министерството за транспорт, извршивме увид во реконструкција на водоводната мрежа во градот. Се работи за вкупна инвестиција од 36 милиони денари. Ова е втора фаза од проектот, со овој зафат ќе се реконструира водоводот во четири улици во градот во должина од 2 километри или вкупно со двете фази ќе се изврши реконструкција на 5,5 километри водоводна мрежа. 

Со тоа жителите на Ресен ќе добијат квалитетна вода, ќе се реши долгогодишниот проблем со застарената мрежа и честите дефекти, така да ресенчани можат да бидат спокојни во однос на ова прашање. 

Исто така со Градоначалникот разговаравме за претстојната туристичка сезона и инфраструктурата во градот,”– изјави министерот за транспорт и врски Горан Сугарески.

Градоначалникот Живко Гошаревски најави дека ќе аплицираат со проект за трета фаза за докомплетирање на овој проект за да се затвори целосно реконструкцијата на старата мрежа во градот. Исто така тој изјави дека заедно со централната власт ќе работат на подобрување на туристичката понуда во Преспа.